1913ի ամառն էր: Հայ պատանիներու փոքրիկ խմբակ մը, Մխիթարեան միաբան Հ. Թադէոսի ընկերակցութեամբ, Անատոլիայի սրտէն ճամբայ կ՚ելլէ: Քսենոփոնի բիւրուց նման, կ՚ուղղուին դէպի հիւսիս, դէպի ծով: Առաջին նպատակակէտը՝ Տրապիզոնն է. անկէ Կոստանդնուպոլիս պիտի նաւարկեն, եւ հուսկ Վենետիկ: Մեծ արկածախնդրութիւնն սկսած է:
Իրենց հետ տասնըվեց տարեկան Լեւոնն էր, սեւ մազերու խիտ փունջով, պլպլան աչքերով, յարաշարժ. Դատեմի հայրենի մեծ տունը թողած, Խարբերդի նահանգի մէջ, ուղղուած էր դէպի Մուրատ-Ռափայէլեան Հայ Վարժարանը: Ծնողները, ինչպէս նաեւ մեծ եղբայրը՝ Յովհաննէս, այսպէս որոշած էին. պատանին արթուն եւ խելացի է, եւ հիմա որ դպրոցական բարձրագոյն առաջին տարիները աւարտեց մօտակայ քաղաքի՝ Մեզիրէի ֆրանսական Վարժարանը, լաւ է որ լիկէոնը ամբողջացնէ Վենետիկի մէջ, հռչակաւոր Հայ Վարժարանը: Ի միջի այլոց, Իտալիա, ճիշտ վենետկեան լճակին մէջ, իրմէ մի քանի տարի մեծ եղբայրը՝ Յովսէփ, արդէն որոշ ժամանակէ ի վեր նորընծայ էր, Աբրահամ նոր անունով, Ս. Ղազարի Մխիթարեան վանքին մէջ:
Լեւոնը ակնկալիքներով եւ հետաքրքրութեամբ լեցուն էր. նա չէր գիտեր, խումբէն ոչ ոք չէր գիտեր, թէ ի՛նչ դառն դէպքեր իրենց կեանքը պիտի խառեն, եւ ոչ իսկ կ՚երեւակայէր, որ բնաւ երբեք պիտի չվերադառնայ, կրկին տեսնելու համար Դատեմի ոսկեայ դաշտավայրը:
Տունը թողած էր բազմանդամ ընտանիք մը. հայրը՝ Գաբրիէլ, մայրը՝ Նարկիս, փոքրամարմին կին, բայց շատ զօրեղ եւ կամեցող: Մեծ եղբայրը՝ Յովհաննէսը ուսուցիչ էր, եւ Լեւոնի մեկնումէն քիչ ետք պսակուած էր, եւ իր կնոջ՝ Հեղինէի հետ, որ նոյնպէս ուսուցչուհի էր, կը դասաւանդէր ոչ հեռու գտնուող Բազմաշէնի մէջ: Ուրիշ երեք քոյրեր կ՚ամբողջացնէին ընտանեկան կորիզը. աւագը՝ Սառան, Պօղոսի հետ պսակուած, աղջնակ մը ունէր, Մարիամը: Բրաբիոնը, լուռ՝ անհետացած դէպքերու յորձանքին մէջ, եւ Քենովաբէ, Խանըմ կոչուած, այն ժամանակ տասներկու տարեկան, որ յետոյ իր կեանքին մեծ մասը Մարսիլիա պիտի անցընէր: Գիւղի մէջ, մօտիկ, ուրիշ տուներ ալ կային, բազում ազգականներով. հօրեղբայրներ, քեռիներ, հօրաքոյրներ, մօրաքոյրներ եւ թոռնիկներ. մինչդեռ, Եփրատի միւս ափին, Մալաթիայի մէջ, Սիմոնը, Գաբրիէլի եղբայրը, իր կարգին բազմազաւակ ընտանիքի գլուխ էր:
Երկու տարի չանցած, «մեծ չարիքը» վրայ հասաւ Խարբերդի նահանգին եւ հայահոծ տասնեակ հազարաւոր գիւղերու վրայ. տարբեր խուզարկումներու ընթացքին, Յովհաննէսը, իր հայրը՝ Գաբրիէլը եւ Դատեմի մնացած հասուն տղամարդիկ ոստիկանատուն կանչուեցան ստուգումներու համար, եւ անոնց մասին այլեւս ոչինչ չի գիտցուիր: Կանայք՝ քոյրերն ու մայրը, Յովհաննէսի երիտասարդ հարսը եւ իրենց նորածին մանուկը, բոլոր բնակչութեան հետ միասին տեղահանուեցան. ոմանք չվերապրեցան, իսկ ուրիշներու կեանքը ցմիշտ քայքայուեցաւ:
Լեւոն պատանին Վարժարանը աւարտեց եւ փայլուն կերպով բժշկութեան դափնեկիր դարձաւ: Ընտանիք կազմեց Իտալիոյ մէջ, Կոստանդնուպոլսեցի հայուհի Մարիամի հետ, եւ երբեք իր զաւակներուն չյայտնեց թէ ե՛րբ եւ ի՛նչպէս իմացաւ իր տունը քանդող փոթորիկի մասին. միայն պատմեց երկու վերապրած քոյրերու մասին, որոնց դիմաւորած էր Հալէպ, ուղեւորելու համար, փախստականներու անծայրածիր գետին մէջ, մեծին՝ Սառային, դէպի Միացեալ Նահանգներ, իսկ փոքրին՝ Քենովաբէ-Խանըմին, դէպի Մարսիլիա:
Կեանքը կը շարունակուի. Լեւոնը իր առաջնեկ աղջկան վրայ կ՚ամփոփէ կործանած ընտանիքին ամենասիրելի անունները. Գաբրիէլլա Յովհաննա Նարկիս, ինչպէս իր հայրը, եղբայրը եւ մայրը, որուն միշտ յատուկ սիրով եւ հիացումով կը յիշէր:
Երկար տարիներ ետք, Վարժարանի եւ համալսարանական տարիներէն պահուած, նամակներու խուրձ մը, միակ հետքը լռութեամբ ապրուած ողբերգութեան, լոյս աշխարհ կու գայ: Յովհաննէսի հինգ նամակներն են, գրուած 1913ի Հոկտեմբերէն 1914ի Օգոստոսը երկարող ժամանակահատուածին, եւ երկու նամակ ալ Սառա քոյրիկէն, 1919ի Նոյեմբերի եւ Դեկտեմբերի:
Պարտք զգացի ոգեկոչել ընտանեկան այս պատումը, որպէս ձօն Հօրս յիշատակին, որու աչքերուն մէջ միշտ որսացած եմ մեծ կարօտը՝ ծննդավայրին հանդէպ: Սակայն նամակները կը կրեն անմիջական արձագանգը հայ հասարակութեան կեանքին՝ հայրենի հողին վրայ, յոյսերուն, յոյզերուն եւ խմորումներուն՝ որ այդ փոքրիկ աշխարհը կը ցնցէին, ինչպէս եւ մեծ աշխարհը՝ հեռաւոր բայց ոչ օտար:
Օգտագործուած լեզուին համար եւս, մէկ դար հեռաւորութեամբ, այս նամակները փաստաթուղթեր են որ կ՚արժէ հրատարակել եւ ուսումնասիրել տարբեր տեսանկիւններէ: Այս պատճառով, աւելի քան քսան տարի առաջ տեղափոխութեան մը ընթացքին պատահմամբ գտնելով, վերջապէս որոշեցի հրատարակել բնագիրը, ընծայելով իտալերէն թարգմանութիւնը, ծանօթագրութիւններով հանդերձ: